Breeze Ship Design vann næringsprisen på Stord

Næringslivet på Stord var samla til den tradisjonelle årsfesten der høgdepunktet var utdeling av Næringsprisen for 2023.

Ove Wilhelmsen er medeigar og leiar i Breeze Ship Design. Foto SMe.

Dette skriv Stord Næringsråd på sin nettstad.

I grunngjevinga frå juryen heiter det:

• Breeze Ship Design vart etablert av lokale krefter som tok tak då strategien til store konsern ville det annleis.

• Verksemda er tru mot eigen idé og filosofi. Dei leverer skreddarsydde design basert på ei analytisk tilnærming til kva behov kunden har.

• Breeze Ship Design er opptatt av grøne og berekraftige løysingar for designa sine og samarbeider med andre aktørar for å få nullutslepp i skipsfarten.

• Vinnaren kombinerer moderne og effektiv design på ein framifrå måte med den gode arven skipsdesign har i Sunnhordland.

- Reinert Nordtveit, COO i Breeze Ship Design, tok imot prisen på vegne av verksemda. I takketalen la han vekt på at selskapet byggjer på gode tradisjonar og godt samarbeid mellom ulike aktørar på Stord og i Sunnhordland, skriv Stord Næringsråd.

Næringsprisen er eit samarbeid mellom Stord Næringsråd og Sparebanken Vest. Prisen blei delt ut av juryleiar og banksjef i Sparebanken Vest, Svein Ottesen.

- Næringsprisen skal bidra til å skapa merksemd rundt næringslivet og gje honnør til dyktige næringslivsaktørar, heiter det.